أيا قاهرة
أقول ع اللي منك ولا اللي فيكي
ولّا اللي جالك مرة وبيحلف تاني ما يجيكي
ولا اللي زارك صدفة وبيحلم يرجع ليكي
كل اللي فيكي غريب
حتى اللي منك ليكي
حتى ترابك تايه
بيدور على موانيكي
فينك يا بلد التاريخ
فينك وفين أراضيكي
شوفي اللي إسمك قهروا
مقهور وبيموت فيكي
شوفي اللي شعبك هزموا
هيموت ويرجع ليكي
أهلك وناسك مالهم
مابقوش يحلموا بيكي
يمكن حسن الضيافة زمان
كان سر حبهم ليكي
فين الضيافة يا كايرو
ضايفيهم دة واجب عليكي
عن نفسي أنا غريب
سوا فيكي او مش فيكي
ضيف على دنية بشر
و أوقات بشوف أهاليكي
كلّهم أغراب
وبيهربوا منّك
بس برضو فيكي
الغربة مش بالمكان
الغربة بقت حروف اساميكي
انتي ايه ... انتي مين ... قوليلي ميك يحكي حكاويكي
الناس الكتير في الشوارع
ولا ألوف قهاويكي
شوفي غرابة حياتك
ونظرة عيون أهاليكي
ماشيين في الشوارع
ف حواريكي ونواحيكي
ناس بتجري وهيا خايفة
عشان تقدر تعيش فيكي
واوتوبيس عتيق من زمان
مخنوق في زحمة أهليكي
شايل كتيير م الزمان
و ولا مترو او ميكوباص بيأثروا فيكي
ناس بتركب وناس بتمشي وناس بتنقل ناس
وبرضو منك فيكي
ناس في البيوت من زمان
خايفة تخرج تتطمن عليكي
الطفل فيكي كبير
ولما يكبر بجد برضو بيتوه فيكي
سمعت عنك زمان
ليه بطلوا يحكوا حكاويكي
كرهوكي من نفسهم
ولّا كرهتيهم فيكي
كتبتها ف 2008 و برضو القاهرة لسا زي ما هيا
:D
ـــــــــــــــــــــــــــــ
... مؤمن الرفاعي
0 comments:
إرسال تعليق