أنا متمرد

أنا متمرد 
عادي حياتي ومن حقي  أختار 
أصل الحب  دة ذوق وقرار 
ليه أنا أشغل بالي بواحدة 
كل حياتها كلام  وفشار 
أخر مرة أختارت حاجة 
دخلت ثانوي بمجموع جبار 
ماشي يا بابا ماشي يا ماما 
وبعد ماندخل فيلم رومانسي 
ألاقيها بليده ماعندهاش قرار 
ماشي بَحبَك وسمعناها 
ماشي حبيبك وعرفناها 
طب يا ستي انا عايز اتجوز 
قولي لبابا قولي لماما
قولي لأخوكي دة مـ الثوار 
ليه يختاروا معاكي حبيبك 
ليه هستنى الرد كأني
ولا أنا عارفك ولا كلنا فشار 
هوة قرار محتاج لمشورة 
ايوة انا عارف لازم شورى 
لازم نقعد نقرا جرايد
ونشوف أبراجنا ونعمل فيش  
بس انا عارفك 
وانتي عرفتي 
ليه هستنى كلام عزالي
لما يقولي اني ياعيني لسه صغير 
وان قريبك ابن قريبتك بنت قريبتك بيموت فيكي 
طب انا مالي 
روحي يا ستي شوفي حياتك 
وانا متمرد 


انتي الرقم الكام في حياتي 
زيك زي كل حياتي 
اروح انا ارسم واعمل خطة 
وأكتب شعر ويجي حرامي يسرق أبياتي 
أنا متمرد وحياتي سياسة 
يعني مثلا 
كان في شعب غلبان مش عارف 
ضحكوا عليه عصابة وباشا 
سرقوا شقاه وأخدوا حياته 
وبعد سنين فاقوا الساسة 
عملوا ثورة وجابوا رئيس 
واحد منهم ومالي المركز 
عامل خط وماشي عليه 
عنده مبادئ عندو ثوابت عندو قرار 
بس خسارة مش وقت ثوابت 
لازم ثورة 
حتى الحب لازمله ثورة 
مش بس كلام تثبيت ومحاورة 
قالها زمان كاظم لنزار 
إني لا أؤمن في حب
لا يحمل نزق الثوار 
لا يكسر كل الأسوار
 لا يضرب مثل الإعصار 

لازم يوم تختاري حياتك 
دة الشعب اياه ساب الثورة وراح يتمرد 
فاق متأخر وبعد مافاق بدأ يهرج 
بعد ما حقق حلمه يا ستي راح يتمرد 
طب أنا متمرد على أيامك 
أنا متمرد علي جيل أنا منه 
بعد ما عرف الحب اتجوز واحده قريبته 
وبعد ما عمل الثورة راح يتمرد 
أنا متمرد