بحرك يساع

إرسم لحلمك مركبه من غير شراع
وتكون عليها ربها...  تؤمر تطاع
والموج معاك إن قلت ثورة
وإن قلت اهدا يقول مطاع
حاسس بحلمك خطوة خطوة
مؤمن بصدقك حتى النخاع

وان جيت تخون ولو لمره
وتعيش في بر بدون صداع
يفضل يردد إنه فاكر
حلم اللي كان لاجله شجاع
قادر يثور ويقول دة ظالم
وللعدل سمعا واستماع
يفضل يردد كلمه كلمه
إن القدر مش بالشراع
وان اللي يصبر لاجل صيده
خايف أكيد أو عقله ضاع
وازاي عشان الحوت يغور
الموج يثور سطحا وقاع
والبر مهما يكون أمان
مش ليك دة مخلوق للرعاع
تلتينها ميه وبحر ثاير
وتقولي أهرب م الصراع !

إرسم لحلمك أمواج كتير
أمواج بتتكلم لغات
ويوم يموت الحوت الكبير
ساعتها قول للدنيا تيجي
مادام ساعتها  ..  بحرك يساع
بحرك يساع