لن نفترق ... لكننا لن نلتقي أبدا

مش بس طريقتك لما تقولي ألو
ولا بس حلمك اللي عاتبتك عشان حكيتيه
ولا بس لإنك أول حد يخش الباب و أرحب بيه 

قبلك دخلوا وكنت سايبهم
ماطردتش حد
عمري فمرة ما شوفت فواحدة نقص بجد 

بعدك كل بنات الدنيا ناقصها كتير 

يمكن تحكي ويمكن تضحك زيك بالضبط 

بس كلامها زي سكوتها مابشوفهاش 

وانتي سكوتك ويا كلامك نفسي أنساه ومابنساش

كنت بحبك حب يخلي الحب يشب 

حب بيكبر لحظة بلحظة كلمة بكلمة 

يعني كلامي وسط كلامك كان معدود 

ورغم سكوتك ورغم سكوتي كان في حب 

بعدك كل الدنيا كلام في كلام 

بس كلام ماعندوش قلب

كنت بحبك لما قفلت السكة ف وشك 

لما حلفت اني نسيتك واني كرهتك ومش عايز أغشك 

لما بكيتي ولما أنا كنت بزعق فيكي
كان مليون مسمار أتدق في نعشي وجرّح نعشك
عدى العمرولسا أنا عايش في أول يوم
كإنه امبارح ولسا أنا قاعد وشي ف وشك
فاكرك وانتي ف وسط الناس ماشية بعزة 

مالكة الدنيا في ايدك وماليانة فخر لإني بحبك
إيمانك بيا ثقتك فيا حتى دلالك لما تكوني آل ايه زعلانة
ودعت معاكي كل ما فيا
مابقتش بحس بحاجة إلا بحبك

مش بس طريقتك لما تقولي ألو
ولا حتى سكاتك لما أعاكسك عشان تحمّري
 حاجات مش عارف أقوللك عنها
كنت فاكر إن الوقت هيلغي مكانها
ليكي في كل فصول العام أوقات
ملكك وحدك

هفضل طول عمري على كلامي
عمري ما أغير وعد وعدته
هكمل عمري بعيد عن روحي
وروحي حتقدر تبقى سعيده