روح للبحر

شمس ورمله و موجه خفيفه
وكام شمسيه و كام برجوله
و ناس معدودة
ناس محدودة
بيني وبينهم مشي كتييير

بصيت لهناك
بعد الميه
فضلت احاول اشوف الاخر
لحد الشمس الفرق بسيط
سحاب مع موج وموج في سحاب

قمت نزلت البحر وجيب
ولما رجعت وحشني نزلت ولما تعبت رجعت
ولما رجعت وحشني ولما نزلت نويت
أقعد هناك
بين البينين
بين البر و بين البحر
موجة ف موجه لقيتني بطير
مين بيشد
مين بياخدني
مين بيحاول يستعبدني
أنا مش شيء و بيرموه
حاسس عكس اللي بيحكوه
ان البحر خطير غدار
وان البر عذاب كالنار
حاسس ان الجنه مابينهم
وان هروبي لواحد منهم
مش اكتر من خوف م التاني
وان التاني بيتمناني
وان الأول ثار علشاني
وان صمود الأرض عزيمة
وان ثباتها دة وهم كبير
تقدر تبعد
تقدر تعند
تقدر تحرم رجلك ترفصها

بس العشرة خلتها تحبك
مش مصدقي روح للبحر
مهما يحبك برضو يسيبك
لازم تتعب عشان يرضيك
أما الثابتة
وانت بتمشي بترفع رجلك تستناك
ولما بتسجد تدعي لربك
تدعي معاك
مش مصدقني
روح للبحر
شوف راح تمسك فيك ازاي